Esta intervención, cun investimento autonómico de arredor de 40.000 euros, desenvólvese a partir do punto quilométrico 12+350 da estrada
- O obxectivo é facilitar os desprazamentos a pé dos veciños da contorna dun xeito máis seguro e sostible, continuando o itinerario xa en servizo para acadar o núcleo de Fruíme
- A Xunta acometeu no ano 2019 unha senda que comunica os lugares de Murzás, A Badía e o cruce Aldea Ferreiro, cun investimento de 48.000 euros
- O Goberno galego, mediante este tipo de actuacións, busca dotar os concellos de itinerarios seguros, sostibles e saudables para favorecer a mobilidade dos cidadáns
A Xunta vén de comezar as obras de execución dunha nova senda na estrada autonómica OU-300, ao paso polo concello ourensán da Bola.
Esta intervención, cun investimento autonómico de arredor de 40.000 euros, está a desenvolverse a partir do punto quilométrico 12+350 da estrada. O itinerario desenvolverase ao longo de preto de 380 metros pola marxe esquerda da vía e terá un ancho de 2 metros.
O obxectivo desta actuación é facilitar os desprazamentos a pé dos veciños da contorna dun xeito máis seguro, sostible e saudable.
A nova senda daralle continuidade ao itinerario xa acometido pola Xunta no ano 2019, acadando agora o núcleo de Fruíme.
Cómpre lembrar que a senda xa en servizo, que supuxo un investimento de 48.000 euros por parte do Goberno galego, comunica os lugares de Murzás, A Badía e o cruce Aldea Ferreiro, no concello da Bola.
A Consellería de Infraestruturas e Mobilidade, mediante este tipo de actuacións, busca dotar os concellos de itinerarios seguros, sostibles e saudables para favorecer a mobilidade a pé dos cidadáns.